Day 4

8/12/2013
今日要去睇十分瀑布...車程有點遠，我地去到台北車站買台鐵車票時竟然好full...要搭慢車差不多成粒鐘先去到瑞芳，之後又要等好耐先有小火車入十分喎！十分瀑布真係幾正...不過要行好鬼遠先到，但係都值得一去的。最慘既係我地要就番小火車d時間...今日全程冇乜點食野...都幾趕下，去到平溪都已經天黑了，我地買左個4色天燈放，淨係諗寫乜都搞左好耐啦，拎住支筆果刻真係字窮...乜都諗唔到。放完天燈冇耐d舖頭都開始收工lu，我地搭番車出台北車站都差不多十點啦，周圍都好似冇食巿開門咁，誤打誤撞好彩見到和民營業到12點，入去食完個好飽既晚餐後就返酒店lu！

捷運 (松江南京 ~> 台北車站) NT40
台鐵 (台北車站 ~> 瑞芳) NT98
7-11三文治早餐 NT88
平溪線一日遊卷 NT104
十分山水遊樂園 NT200
山豬肉香腸 NT30
臭豆腐 NT60
4色天燈 NT200
麵茶 NT88
天燈手信 NT90
台鐵 (瑞芳 ~> 台北車站) NT98
和民dinner NT915
捷運 (台北車站 ~> 松江南京) NT40

Day 3

7/12/2013
尋日實在行得太攰了，今朝9點落樓下酒店食完早餐後返上房再抖過，差不多12點先出發...去另一個溫泉區 - 新北投。呢度其實最主要去地熱谷睇下姐，沿路o係d溪澗都見到有人o係度浸腳，老公都唔執輸試左...話d水係暖暖的。

夜晚去左士林夜巿行，餓餓地見d水果幾靚就諗住買少少試下啦，點知未講完個阿姐已經切左好多俾我地...真係奸商，搞到我地食水果都飽到嘔...仲要浪費左d添！之後行過見到有檔抽麻雀的，老公話一齊玩下，點知就俾我抽中左wakaka~嬴左個攬枕返黎。o係果度再食下野行下...都差不多11點先返酒店休息lu！

捷運 (松江南京 ~> 新北投) NT70
蕃茄創義廚房lunch NT620
捷運 (新北投 ~> 劍潭) NT50
水果 NT450
麻將賓果 NT200
燒魷魚 NT100
晚餐 NT460
傻狗食物碗 NT119
捷運 (劍潭 ~> 松江南京) NT50

Day 2

6/12/2013
今日天氣好好丫，我地朝早享用完酒店既早餐後，就向烏來出發啦！搭捷運去到新店站再轉客運...搭40分鐘左右就到了...不過太多人搭...要企足全程。落車俾錢時...老公仲擺左烏龍...俾左double車錢.../_\

我地首站去左烏來老街搵食先，果度有好多菜名都未見過的...好似好特別咁，我地仲叫左呢度必食既竹筒飯...不過我個人覺得麻麻地。之後就搭台車去睇瀑布啦，今日雙腿開始感到好累了...行幾級樓梯都要抖一抖先再行...好似d老人家咁。其實烏來好似係出名浸溫泉而唔係睇瀑布的，不過好可惜我唔浸得溫泉...冇得o係度stay一晚。

睇完個唔係好吸引既瀑布後...我地考慮左好耐究竟搭唔搭果架危危符既纜車好，後尾見到原來都多人搭...咁我地又試下啦！上左對面山上既雲仙樂園，果度好似一個行山徑咁...行到我雙腳勁累呀，不過好佩服果個年代可以起到d咁既野出黎。行到差不多黃昏我地就搭番纜車落山lu，一入夜就開始凍啦...返到老街買左杯熱杏仁茶飲...仲食左山豬肉香腸...好正。之後見到d溫泉粟米好似好正咁就買左支黎試...不過好失望...又冇味又多渣。

離開烏來後，我地去左好多人推介既"肥前屋"食晚飯，去到果然排緊長龍...不過都好彩唔駛等好耐就有位了 。今日行到攰攰地...九點左右就返酒店休息lu！

捷運 (松江南京 ~> 新店) NT70
新店客運 (新店 ~> 烏來) NT60
烏來小吃店lunch NT300
台車 NT100
纜車(來回) NT440
台車 NT100
山豬肉香腸 NT35
杏仁茶 NT35
溫泉粟米 NT35
新店客運 (烏來 ~> 新店) NT30
捷運 (新店 ~> 中山) NT70
肥前屋dinner NT520
捷運 (中山 ~> 松江南京) NT40

Day 1

5/12/2013
朝早9點幾我地就出發去搭機場巴士啦，點知等到成10點先有車...頂！去到機場check in完行一陣就夠鐘上機啦，我地班機係11:20am，去到台北一點鬆d就落機lu！一到步緊係要唱番d台幣同埋買番張電話咭先啦，都搞左成粒鐘先可以搭車去酒店。今次對呢間酒店有點兒失望...唔太似酒店，不過d service係ok的。安頓好d行李後我地就去附近醫醫肚先啦，之後就去左忠孝復興站果一帶行下喇！夜晚果餐諗住去旅遊書介紹的豚屋試試的，行到去見到門口有隻黑豬仔諗住實冇錯啦，點知坐低先發現原來呢間叫Pigi Pigi，究竟係改左名定我地去錯呢?!

食完餐好飽既晚飯我地就向Hello Kitty Sweets出發啦，呢度每人最低消費要NT300，不過一個蛋糕餐都唔止了，但係室內環境都值番o係度啦haha~

兌換台幣 (兆豐國際商業銀行) HKD3000=NT11037 (@3.679) 

台灣大哥大 (5日無限上網+30分鐘通話) NT300

長榮巴士 (桃園機場 -> 南京東路) NT300

四海遊龍午餐 NT120

捷運 (松江南京 -> 忠孝敦化) NT40

Pigi Pigi晚餐 NT506

Hello Kitty Sweets NT792

捷運 (忠孝復興 -> 松江南京) NT40

pre my birthday dinner

13/12/2013
今日終於都send左封email去保誠corp comm度投訴，估唔到黃昏時就已經有人打黎問我詳細情況，話調查完後下星期俾回覆我。

夜晚約左anna, ying & carrie去旺角食飯，好surprise佢地買左個蛋糕同我慶祝，初時我仲以為係waiter放錯枱添haha~咁耐冇見...今餐飯真係好開心，不過佢地為家庭事都好似好多煩惱咁...真係家家有本難唸的經呀！

14/12/2013
今日到屋企人同我食生日飯了，原先想去酒店食buffet，點知呢幾日打去好多間都full晒，之後諗住日式放題啦...估唔到都full，最終我地要去打邊爐，一行12人去hipot度一人一爐，我個人覺得呢間野麻麻地，下次唔會再試了。

16/12/2013
前排maggie知道我有病後話想探我，不過當時我化療期間又唔係幾想有人上黎我屋企，最終約左今晚出黎食飯，有maggie, joey, carrie, tony & grace。我地去左尖咀d樓上cafe度，d野食味道都幾唔錯，今晚又有surprise...佢地又買左蛋糕，但maggie知道我唔食得cheese後好徬徨呢haha~但其實佢既心意我收到晒的 ^^

電療劃位啦

3/12/2013
今日又要去瑪嘉烈了，11點上到去姑娘話要換定袍等醫生叫名，足足等左兩粒鐘先到我...亦係最後一個。今次呢位醫生話要電31次，佢話其中幾次係要加電...重點電我腫瘤位置。好快地幫我mark好位後就可以換番衫走人啦！我落左去葵芳食完野又要再去醫院做掃瞄，今次唔駛等，換完袍就可以入掃瞄室，不過上身連假髮眼鏡乜都要除晒，訓定o係度等醫生幫我度位，再o係部機度掃瞄左幾次，之後醫生再幫我整tattoo...以後我身上就多左6點野跟住我啦！要hold住一個姿勢唔郁得真係手都痺埋，搞掂就可以走人等電話通知幾時黎電療了。

又買無聊野

1/12/2013
今早帶完傻狗出去沖涼，我地又去左花墟行啦haha~感覺自己好似d公公婆婆咁。不過估唔到今次老公都有收獲，佢之前o係龍貓店睇中左個石流水都好想買返屋企擺的了，今日o係花墟見到個幾抵玩又乎合佢要求的，終於都買左啦！而我就買左個花盆&一包辣椒種子，希望我d植物換完泥冇晒d小害蟲可以健康成長啦！

盛惠$128的石流水，唔知可唔可以轉下d財運黎我地屋企呢?!哈哈

呢個盆盛惠$78，係老公幫我揀的，遠望有d似金元寶feel

我懦弱...

28/11/2013
今日book左返基金會度淋巴水腫指數，順便去下小組討論...好耐未黎過了，但係上完組我好upset，我真係覺得自己做人好失敗...好怕o係多人面前發言，今日o係組度我講完既野都唔知自己講乜，都唔知其他姊妹會點睇我。

今次既淋巴指數係3.1，比上次做完手術度還低，我問姑娘我咁樣浸溫泉怕唔怕佢又唔答我喎，其實都唔知度黎做乜!?

29/11/2013
保險agent今日call我，話公司唔接受當我單野係住院咁賠償，個agent仲叫我搵醫生寫番封信証明我有需要入醫院做化療，佢都真係癲癲地，自己做錯事仲竟然叫醫生backdate寫信，真係完全唔用腦諗野又冇責任心。

夜晚老公過左黎食飯&幫我手搬行李丫，我正式可以搬返MySweetHome住啦！yeah~

預備篇

11月突然心血來潮想去旅行，估唔到老公一口應承左hehe~原本想去新加坡...不過因為種種原因最後都要否決，要等我完晒療程先可以考慮lu！最終都係近近地去台北算了。今次個trip我地打算唔plan行程...hea住遊，不過我有唯一一個要求...就係要搭eva air既hello kitty機haha~上網book晒機票酒店，買埋旅遊保險，搞埋台証，12月5至9日...期待我地既台北hea trip啦！

zuji - eva air機票連tax $3401
hotels.com - 舞衣新宿南京店(豪華客房包早餐) $3001.44
boc - 旅遊保險 $148.75

首次去瑪嘉烈見醫生

27/11/2013
今日同埋媽咪&工人過去MySweetHome度等工人幫我清潔下間屋，順便要工人開始熟習下呢邊d環境啦！

晏晝我要去瑪嘉烈度見醫生，等左個幾鐘先叫我名，係一位好後生的男醫生，同佢傾傾下停經針呢個問題...佢突然行開左好耐都唔返黎，真係有d燥燥地公立醫院d醫生咁hea。等佢返到黎...佢同我講話佢問左個專家意見覺得我冇需要打停經針，而之後既電療要電21次&食5年tamoxifen。傾完就出去等排期返黎劃位...下星期二再返黎，搞掂走人都成五點幾啦，咁o岩今日老公都請左半日假去拎passport就順便黎接我走啦！

化療第四針...第八日

26/11/2013
今日係為化療既最後一次抽血喇，蔡醫生話我好叻身體幾好，不過埋尾都要俾佢話我好食麥記，哈哈！我而家食野其實都開始放肆的了，已經冇初初咁緊張啦！好快見完醫生就走得lu，以後返黎就只係覆診姐！

唔知係咪鬆左一口氣既關係今日心情勁靚，連看更怕怕都話我面色好好，哈哈！

化療第四針...第六日

24/11/2013
今早同親戚去飲完茶之後，我就約左老公出街啦！一田正值減價期，我地去左荃灣店睇下有冇平野買，順便要預備工人d床單被舖了。荃灣店唔係好大...都唔係幾好行，我地好快兜完一轉就鎖定目標，買左套床單被袋&一張被啦！之後就去麥記食左個包醫肚就返屋企lu！

噢~一個星期冇返MySweetHome就已經唔開胃了!!今日我返黎既主要原因係要監工haha~因為前日o係IKEA度買左個安全欄諗住裝o係走廊度，防止隻傻狗走佬工人又捉唔住haha~裝起個樣都唔太差...我地都幾滿意，真係辛苦晒老公了。

 



呢個安全欄既好處係開住時唔會霸住走廊空間，地面又唔會有條橫樑，真係好一流的

化療第四針...第二至五日

呢幾日胃口唔太好，望見d野食就唔想放入口了，人都好似比之前三針累d，不過竟然係俾一餐麥記早餐開番晒胃口haha~但係貪食之過...搞到喉嚨有少少痛，好彩訓番覺飲多d水就冇事了。

保險果單野真係令到我覺得好煩，都唔明白一路以黎點解我要咁操心去搞而唔係個agent為我操心的，咁要agent黎有乜意思?!我終於忍唔住要俾說話佢聽啦，我同佢講唔明白點解我預早一星期通知叫佢幫我問，但佢都一路冇回覆，係咪o係呢件事上佢根本冇上心幫我?!佢聽完都好似冇乜歉意咁，都係堅持話就算我安排左入院做化療...醫生解釋唔到點解要入院做...我都未必會claim到。究竟佢明唔明咩叫責任心?!問題在於佢冇幫我跟進而令我有損失囉!!

23/11/2013
今日終於打埋最後一支升白針啦...我畢業了！好開心，化療路上唔算辛苦，我遇到既醫生護士都好nice，雖然患病係好不幸，但都有其它野有所得著的，要學識放慢腳步享受人生。

化療第四針...第一日

19/11/2013
今日六嬸上左黎探我，順便留佢喺度食晏，原來佢咁啱晏晝又要過中環而又未夠鐘，咁就上左蔡醫生度陪左我一陣啦！我今次吊最後一針了，好開心可以咁順利進行，呢排仲留意到自己啲頭髮開始生番出黎喇添！感恩暫時既抗癌路並不辛苦。

但係今日發生左件激氣事，話說我第一份住院保險已過90日，照理我今次化療可以安排入院做...咁咪應該claim到新一份住院丫！上星期一我已經問我保儉agent我今次吊針安排入院做有冇得claim，佢當時既答案係...以佢所知應該唔得，話如果人人都係咁做保險公司咪蝕錢，而且佢啲客都冇試過claim化療，不過佢話會再問下公司第二日覆我喎！一路等佢都未有回覆，以為冇消息即係冇得claim啦，點知等到今日我喺診所吊完針返屋企佢先打俾我，話可以入院做照claim住院。因為佢既過失令我白白冇左二萬幾蚊，呢單野搞到我谷氣左成晚，真係唔病都唔知佢咁唔專業的！！！

另外阿bi今日又爆左單笑料出黎，話說佢今日放學返屋企唔見姐姐，就問婆婆做咩唔帶佢過黎，婆婆話：佢要喺屋企做野嘛！
阿bi：咁你應該請兩個，一個留喺屋企做野，一個過黎同我玩丫！
婆婆：請夠十個俾你好冇？！
阿bi：咁又唔好，阻訂呀，又嘥錢。（聽到佢講呢句真係笑到肚攣呀！）

化療第三針...第十九至廿一日

16/11/2013
今早約左9:30去蔡醫生度覆診，點知塞車遲到了。抽完血去左麥記食早餐，食完返蔡醫生度已經坐滿人了...好彩今次唔駛等好耐，量完血壓體重冇耐就可以見醫生啦，期間我問左姑娘一條好無聊既問題，因為tvb播緊oncall36小時2，我見魚仔有腫瘤但只係電療就得，覺得奇怪，估唔到姑娘轉問蔡醫生...我一入去就見醫生上網搵緊段片啦hahahahaha~醫生幫我check完後話我身體幾好，下星期二可以打最後一支針啦yeah~

之後我地去左太子睇門欄，因為怕遲d姐姐欄唔住傻狗俾佢衝左出門口又捉唔返，所以我地決定o係走廊裝番個欄啦！不過睇左好多間都冇乜o岩...一係就超貴，諗住返屋企淘寶下有冇平d先再諗lu！下一站到我去買番d秋冬衫，行過一間舖仔一口氣買左三件，條氣順晒之後去roxy拎埋件褸就返屋企食tea啦！

夜晚果餐我地都好想食寿司，點知為左睇電視...出到去人地都已經截左單了，只好去食拉麵lu！

17/11/2013
是日係郊遊日，帶埋傻狗一齊入南生圍行下...開心死佢。不過我好詐...行左半個鐘左右就腳仔攰了，我地喺果度逗留左一個鐘就打道回府啦，傻狗返到去都訓到死豬咁lu！而我就執包伏今晚又要返娘家啦！夜晚果餐終於都可以食番寿司了結心願了，哈哈～

唔知係咪今晚娘家冇人喺屋企既關係呢（爸媽返左大陸，叫左姐姐落家姐度住幾日），我今次特別唔捨得走，食完晚餐要返去MtSweetHome度睇埋獎門人先走。點知返去途中媽咪打俾我佢地乽返緊香港了，我唔駛孤伶伶啦！

18/11/2013
朝早約左10：20去張醫生度覆診，點知都要等粒幾鐘先到我，偱例檢查完再傾下咁就走得，又冇二千。

今日個巿升得好勁，好彩上星期我放唔到今日再執多少少，哈哈哈哈～

化療第三針...第十二至十八日

9/11/2013
今日老公的左傻狗出去沖涼，之後我地就去太子食lunch再去花墟行下。呢排見盆虎尾蘭啲泥有一隻隻白色既野喺度行，體形仲細過粒白芝麻...都唔知係乜傢伙黎，原本諗住買泥換左佢，但問完店員後...佢見議我買支植物滅蟲噴霧仲好喎，因為換完泥都有機會有蟲，咁又試下work唔work啦！搞掂接埋傻狗就返屋企lu!

夜晚出街食飯我又消費買野啦！明明冇收入我都仲成日買野真係有啲罪過，不過...roxy做緊promotion丫，有68折，咁啱我又睇中件褸，仲要係我今年既target...毛毛褸，仲要係雙面架喎，折左都係五百幾，咁抵唔買真係對唔住自己，哈哈！

食完飯老公就要出去行奧比斯lu，得番我同傻狗獨守空房。

10/11/2013
老公行到朝早先返黎，訓到好晏先起身，結果我就做家務打發時間啦！夜晚同埋大姑奶大姑爺食飯，講起有個中醫專睇癌症病人的，將一個三期乳癌既人醫左個幾兩個月變番做一期。究竟中醫係咪真係咁勁既呢？！

11/11/2013
今日終於都book埋台北住既酒店啦，心大心細之下喺hotels.com度book左"舞衣新宿南京店"，四晚大約三千左右都幾抵，不過都仲掙扎緊究竟去唔去烏來住一晚溫泉酒店呢?!

13/11/2013
今日下晝約左去張醫生度覆診，我又可以休息一日唔駛煮飯啦，諗住過娘家度食埋lunch，點知搭車途中姑娘打黎話醫生今日唔得閒要同我改期，真係激死人。

返到娘家無耐阿bi細佬都上到黎啦，我地食完飯就落維園玩，最開心都係阿bi...因為多個姐姐同佢玩，第一次見佢玩到唔捨得走。 玩完我地去買麥記食...我又偷雞食左少少kaka~

夜晚老公都過埋黎食飯，我地走時由於跑馬地今日跑馬...老公行錯路...我地要焗住遊車河啦，原本半個鐘既路...我地要成個鐘先返到 /_\

15/11/2013
今日個巿好醒神...升左四百幾點，仲以為我set個價可以放得到，點知爭果一仙...我就沽貨失敗了。

化療第三針...第十至十一日

7/11/2013
呢排見d脫髮問題不大...終於都可以約去做番facial啦，兩個幾月冇搞過塊面了。去到詩琳...佢地都好關心我近況，大家都有為我加油，佢地仲以為我冇甩頭髮...話個假髮好真呢haha~而且我塊面竟然冇乜污糟野要清...真係估唔到，係咪生活作息正常左...皮膚都好埋呢?!呵呵~

facial完返屋企繼續搵旅行既資料，我地終於都有定案啦，決定左去台北hea遊，等老公confirm到可以請假...我就即刻上網book機票啦！估唔到相隔三日選擇少左又貴左，格過價之後最終o係zuji度搞掂了，$1701 x 2 adult...成交，hahaha~仲可以搭hello kitty機添wakaka~

8/11/2013
今日頸後d皮膚唔知咩事好鬼痕，初時仲以為係被蚊針，點知照一照鏡睇...哇~腫起一撻撻的，即刻打去蔡醫生度問下關唔關化療針事啦！ 姑娘叫我過去俾醫生睇下，醫生問我有冇食過d乜...係風癩黎，唔知關唔關我尋日做facial事呢?!開左d藥&藥膏俾我，咁又冇左八舊啦，嗚嗚嗚~

今晚家姐一家都有上黎食飯，阿bi仲講左樣笑話...正當家姐叫細佬唔好搞個笑佛時...
阿bi: 咩係笑佛呀?
家姐: 放o係枱面果個囉...
阿bi: 咁佢笑咩呀?
家姐: 唔知呀...
阿bi: 咁罰咩呀?
家姐: 罰佢笑囉...
阿bi: 佢罰到笑呀?!
真係估唔到個佛字佢會諗到個罰字haha~

今晚我又執行李搬返去MySweetHome lu~

化療第三針...第六至九日

3/11/2013
傻狗今日四歲生日了，我又忍唔住要返去見下佢啦...順便睇下我d植物死得未haha~

約左老公12點o係尖沙咀等，不過我搞極個頭都好唔滿意，最終我遲到了hehe~我地去左搵食醫肚先，再行陣街...o係格仔舖買左盒迷仔盆栽玩下，再去supermarket入下貨就返屋企了。hea到六點幾又要出動食晚餐啦，約左爸爸媽咪去金雀据扒，不過d扒好似差左好多...o趙到口都攰埋。食完老公陪我散左陣步我就返屋企lu！

o係格仔舖買既七里香，話種十日就會開始有苖出，唔知會唔會衰o係我手上呢?!










4/11/2013
今日突然諗起...不如化療畢業後去個hea trip獎勵下自己啦，估唔到同老公講佢會一口應承hehe~結果我全日就上網搵下有冇平機票啦！究竟台北好定新加坡好呢?!
台北...唔駛plan行程，因為都冇咩特別野好行，真係hea下食下野姐！
新加坡...我地都未去過，都幾有興趣去...但有個好大既問題...就係咁熱既環境我仲要戴住個假髮肯定熱到我痴線發忟憎。話說呢排我對住個假髮真係無從入手，都唔明已經修過架啦...但係都仲覺得好厚，出街又一定要戴帽喎，都唔知點先可以解決到我呢個煩惱！唉~

5/11/2013
又到覆診既日子了，今次抽完血同媽咪去左super sandwiches度食lunch，食完去左旅行社睇下d package，去新加坡萬一蚊兩個人究竟算貴定平呢?!以往都冇留意呢個地方d價錢冇得作比較添！

原來話咁快又一個月...我又要打收經針了，細問醫生之下...如無意外我要打兩年呢d針，原因係可以加強荷爾蒙藥既作用...再減低3-4%復發率。今次醫生幫我檢查完後話我個report幾靚，相信好快可以康復，第四支針可以如期打啦！

夜晚...我既情緒突然好down諗野好負面...好想喊...

6/11/2013
今日既行程就係要去瑪嘉烈醫院登記啦！本身諗住食完早餐早早地出發的，點知情緒又突然不受控...自己匿埋o係房喊左好耐，夾o岩又有friend whatsapp問我近況，我又猛諗自己既不幸了...

去到瑪嘉烈...原來只係交低封轉介信，我拎番封預約信就走得啦，仲以為要等幾粒鐘架添！

化療第三針...第二至五日

30/10/2013
今日終於都拎左盒羊毛氈出黎篤了，我既性格依然改唔到...一拎上手既野就想快d搞掂佢，結果今日日以繼夜咁篤篤篤，連夜晚老公上黎食飯都冇乜點理佢haha~

食完飯...有個大學生上黎話做訪問，爸爸應承左佢接受訪問...我就當然匿番入房啦，點知佢地一傾傾左兩粒鐘都唔願走...真係難為左我想去toilet都唔得 ><"

31/10/2013
今日開始又要打一連三日既升白針，去到診所d人都認得我了，姑娘話我好叻...好堅強haha~其實馬死落地行...發生左既事就要面對架啦！

1/11/2013
我隻史納莎羊毛氈終於完成了，但係俾老公&媽咪話佢似倉鼠囉......!!

2/11/2013
今日打完升白針後，同媽咪行下維園...兩條友無無聊咁行左個幾鐘之後就買lunch返屋企食，之後成個下晝都係廢人一個咁坐下食下又一日。

化療第三針...

29/10/2013
話咁快就打第三針了，好快就可以完成個療程架啦，我一定要加油呀！

今日我自己一個去蔡醫生度打針，媽咪見我之前都冇乜事就話黎接我走就ok了。今次埋單收平左我haha~收少左個consultant fee，仲有今次可以打少支升白針wakaka~不過吊完針個傷口有啲痛&腫，返屋企拿拿聲要冷敷下佢先。夜晚食飯胃口又不是太好喎，唉～

化療第二針...第二十日

27/10/2013
傻狗就快生日了，不過正日正正係我打第三針既關鍵一星期...未必陪到佢了，所以我地今日預早同佢慶祝。先是帶佢落街兜下圈等佢放低幾両先...都已經開心死佢了。之後就帶佢去荃灣間"寵物茶餐廳"啦！果度裝修擺設都幾舒服，有個area放貨、有幾張好舒適既枱櫈、有個小小遊樂場。我地差不多一點去到，已經有一枱客啦，佢地見到傻狗又話佢fit又話佢斯文，哈哈！坐低後叫左人食既外賣先，之後就同傻狗入遊樂場玩啦，不過個遊樂場啲野太細了...只適合細狗玩，我地入去都只係影左啲相，外賣好快到我地就食野了。期間都陸續有客黎，不過傻狗都唔同其他狗玩既，成日吼住人地個廚房。

我地食飽之後就輪到叫傻狗既小食啦，叫左件三文魚壽司&薯仔味既花花圈俾佢...係即叫即整的，傻狗見到啲野食出黎已經發晒癲了，仲大出洋相添...OMG~諗住要佢坐定定影張相先，但已經控制唔到佢俾佢一咀破壞了個花花圈啦，唔知真係以為佢十世未食過野添呀！/_\ 最不幸係個野食竟然有張膠紙托底...俾傻狗食埋入肚，唉～認真大獲呀！！都唔知會唔會消化到or屙得番出黎的。

我地坐到三點左右就走啦，買左件鴨肉味窩芙拎走，返到屋企傻狗已經訓到隻豬咁了。等佢訓醒就俾埋件窩芙佢食啦，食前當然要同佢影番張合家照先啦kaka~初時佢都亂晒龍...影左好多張都郁，後尾唔知係咪知道再郁就冇得食呢...好合作咁望鏡頭 ^^ 見佢咁乖仔就即刻俾佢開餐啦！之後我地就約埋大姑奶出去打邊爐，我又放肆一餐啦，食完又要搬返娘家作準備了。

化療第二針...第十八至十九日

25/10/2013
今日既體力好明顯下降，出去買完餸返屋企時行一陣就又累又冇氣了。返到屋企成個下晝就攤左喺梳化睇住個巿...學下家姐做c9股神，哈哈。

26/10/2013
今早十點約左返蔡醫生度抽血+覆診，今日個抽血姐姐手勢好麻麻...痛之餘仲搞到我流血 ><" 之後同老公去左食我好耐冇食過既麥記早餐，再等見蔡醫生...又要等到十二點鬆啲先到我。醫生話我今次個報告啲指數好靚，我第三針可以如期打啦！

走人返過娘家果邊接埋媽咪同工人姐姐過去MySweetHome度叫姐姐幫我大掃除，而我同老公就出去睇左套爛尾片"彊屍"，返到屋企姐姐都已經好自動波幫我搞掂晒了...仲煮緊飯添！今晚要爸爸媽咪咁遠水路黎食飯真係辛苦晒了。

化療第二針...第十一日至十七日

18/10/2013
今晚約左carrie & oscar去荃灣莎樂美据扒hehe~食飯前我同carrie行左千色店，買左張史迪仔毛毯仔for呢排d天氣用的，而家轉天氣夜晚訓覺時涼時熱咁真係好易病。買完後就去食我既扒啦hahahaha~渴左好耐終於可以放肆一次了，我地唔覺唔覺都傾左兩三粒鐘，係一個開心既晚上。走時仲有老公過黎做柴可夫，真係抵鍻 ^^

19/10/2013
終於都打敗仗...朝早起身又打噴嚏又流鼻水，頂唔順即刻落樓下睇醫生啦，呢啲關鍵時刻唔可以俾自己有事的。好不幸地醫生放假...只可睇代醫生...流流地，食晒三日藥都冇乜起色。

22/10/2013
今日好早就要起行去北角學淋巴運動了，一堂兩粒鐘，都教左幾多款式下，冇記性既我學完都好似斷片咁，哈哈。學完返左娘家食飯，之後再去睇多次醫生。

屋企個工人姐姐終於到步了，暫時觀察都幾好，希望唔駛換人啦！

24/10/2013
夜晚約左老公既friend黃氏家族出去食飯，睇住佢地對女真係好得意，自己湊就真係自問唔掂當了，哈哈！

化療第二針...第六至十日

13/10/2013
朝早起身就好似冇氣冇力咁，不過約左家姐一家&六叔六嬸去太古飲茶...好耐冇見過啲外甥呢！飲完茶又返屋企hea左半日，老公就打黎話要贖罪陪我出街行下haha~我地去左西九龍睇羊毛氈，果度display左好多製成品出黎都好靚的，我今次買左盒史納莎返屋企玩！行左兩粒鐘腳踭又開始痛了，之後返新都會醫肚，順便去百佳換個熱水壼，不過d貨好多問題...又要等第日了。

如果有出歌基就好了...咁我就可以篤隻傻狗出黎啦！><"














14/10/2013
今日同老公出左青衣城食晏，叫左個二人餐食完有d罪惡感hehe~因為又有辣又唔係清啖的一餐。之後去百佳拎埋個壼我地就出番新都會買袋，話說我個袋已經內傷左一段日子了，係時候要退伇lu！

夜晚返番娘家了，兩老都病左...但又唔睇醫生，我今次真係身處險境丫~

15/10/2013
停左兩日既升白針，今日可以繼續打埋最後一支啦，不過今日發現上次打針既位瘀左...唔知係咪打完針姑娘o係度"初"個針口導致呢?!今日見佢又想"初"都叫佢停手了。

晏晝拎左d羊毛氈出黎起壇了，不過唔係篤史納莎，係拎番之前結婚用剩既毛試下篤隻歌基出黎，個初形成隻鴨咁wakaka~

16/10/2013
朝早十點要去蔡醫生度抽血啦，搞掂就同媽咪去嘆個早餐再慢慢等見醫生。今日都唔知咩事，等到十二點半都未到我，媽咪要趕住返去煮飯...我自己留守到點鬆啲先見得醫生。上次種菌報告返左了，醫生話驗到有菌...但咁啱俾我食果隻抗生素正正係打果隻菌的，咁可以放心了。今次又有新奇野...醫生睇完個驗血報告好大反應話我白血球個數高，問我有冇咩特別唔舒服，話我下次可以試下打少支升白針，我又可以升班了yeah~另外我今次驗埋乙型肝炎抗體...>1000有排用。

17/10/2013
今日執埋晒d單去左觀塘度搞公司保險d野，之後就約左班舊同事飲茶，有個師奶好老土...係都要塞封利是俾我祝我身體健康，haha~我知佢好緊張我，不過實在太尷尬了，但最終我都要收左佢份心意。

飲完茶老公過黎接我，佢今日專登請左半日假陪我去佢個friend度剪頭髮，雖然已事先同對方講明我戴緊假髮，但好怕俾周圍d人知...不過最終都係要豁出去。好快搞掂...剪走左我好多錢haha~個假髮輕晒，仲買左支power shake...話可以令d頭頂位鬆d望落冇咁假喎！剪完返去MySweetHome hea...不過一開門個場面好震撼，傻狗嘔到周圍都係，我地要大清潔啦！抹完地抖左陣就返娘家食飯，順便執埋d行李我又可以搬返MySweetHome住一排啦！

化療第二針...第二至五日

9/10/2013
晨咁早五點幾就醒左訓唔番，咁o岩開whatsapp見有同路人send左段youtube link係訪問林淑敏的，睇完一個鐘都未訓得番...索性起身做下d簡單運動啦，之後就抹下房清一清理d垃圾先hehe~

今日都唔算有咩特別，只係雙眼比較乾，要成日滴住眼藥水黎舒緩下，又要訓下晏覺。

10/10/2013
又係五點幾醒左，基本上係成晚醒下訓下咁...搞到眼仔都紅晒。醒左勁肚餓...食左件蛋糕後又做下運動啦，之後就恰多陣喇！

今日打第一支升白針，冇上次咁骨痛既情況出現，只係有少許輕微肚瀉咁。

11/10/2013
好好彩今日訓到九點先起身，而家慣左每日起身都要做少少運動先，等自己心理舒服d，haha~

今日喉嚨有少少唔舒服，又有少少骨痛，繼續有輕微肚瀉情況，不過呢d都係TC既副作用...唔理lu！夜晚老公過黎食飯，俾我捉左佢陪我落街行下，我要買多頂cap帽...最終都俾我搵到...$199成交好抵haha~仲俾我買左樣無聊野...係整瀏海的，o係商場舖仔買$15，之後o係街舖竟然見賣$35...食水真係深。

晚餐媽咪整左我勁耐未食過既豉油雞翼...好感動好開心haha~胃口都大增呀！

12/10/2013
四點幾餓醒左食左d提子再訓過，今日成日都好似好累咁，去打完升白針同媽咪去左living plaza度行左陣，腳踭位有d痛。lunch我地落街食左越南粉...破戒haha~

老公今日同親戚去左拜山，我為免感染所以冇跟去lu，而且都唔想男家知道我有病...唉~其實收收埋埋真係好辛苦，呢排的gathering我都缺席又唔知人地會點諗。

夜晚老公約左friend去飲野，但佢今日全日都冇搵過我，我又亂諗野...覺得佢有朋友就當我呢個老婆透明了，點解可以一個電話都唔關心下我呢?!其實我要求好簡單姐，亦都唔係要佢o徒好多時間姐...越諗越燥之下搞到我o係whatsapp嘈佢，但佢好似都唔覺有乜問題咁，仲upload左d party相o係fb度，我一嬲之下就unfriend左佢啦！成晚都訓得唔好，究竟係咪我太小題大作呢?!

化療第二針...開針了

8/10/2013
尋晚失眠夜...訓到四點幾就起左身碌到六點幾先訓得番，搞到雙眼今日超累丫。

晏畫媽咪陪我去蔡醫生度打第二支化療針啦，順便打埋打經針。今日蔡醫生好好笑容...仲講笑添haha~佢好鼓勵我自己試下打升白針，話只要試過一次就會熟能生巧喇喎！haha~今次照舊吊左三個鐘左右就走得lu，吊到第二包藥時個喉嚨有少少頂住，不過好彩過一陣就冇事了。不過今次d藥丸加碼啦...有d最多要食三個星期wuwuwu~睇見咁多包藥都唔開心呀！

之後同媽咪去左supermarket買左好多生果返屋企。夜晚見閒閒地幫個假髮洗下頭，一搞都搞左半粒鐘了。

唔知係咪打完針會成日好肚餓既呢，今次臨訓前又係要食件蛋糕先訓得。

化療第一針...第十九日至廿一日

5/10/2013
朝早老公過黎兜埋我去蔡醫生度抽血+覆診，唔知係咪我已經對打針抽血呢d事麻木了...一d感覺都冇，好快搞掂就同老公去食早餐lu！照舊個半鐘後有報告，醫生循例問下我呢排有冇d咩特別唔舒服啦，我尋晚就發現我開刀位置有膿流出黎，醫生話可能係d線溶唔到導致含膿，幫我洗完傷口後順便拎d膿去種菌睇下有冇事，為安全起見要食一個禮拜抗生素...唉~另外我個報告驗到我肝酵素偏高...又要食多隻保肝藥...唉~不過醫生話打呢隻化療令肝酵素高都屬正常事，我只希望食左藥唔會引發其它病出黎啦！

夜晚約左朋友K & A出黎補食番佢地的生日飯，本身朋友B都一齊出來的，不過佢班機delay左返唔切黎...噢~唯有我地三人照食啦！去左中國芳等左半粒鐘先有位，打開menu又係好多野我都唔食得，要佢地就我黎點野食真係有d唔好意思。我地傾下佢地d湊仔經、講下我近況、討論下工人姐姐...估唔到都吹左兩粒幾鐘 haha~

6/10/2013
終於都等到今日了，係我張工人組合床送貨黎既大喜日子hahahaha~一路都好期待實物造左出黎會係點，可以襯我有精神時執埋間屋啦！師傅好準時兩點前送到黎，佢地都算細心...搬貨入屋時會慢慢留意唔會扣花我d牆，好多件組合話咁快就上好啦，雖然d櫃桶既顏色配搭同我本身出份圖有少少唔同，不過老公話唔係問題...當係另一個design喎，我地都算係幾無所謂下haha~之後就到我地大清潔既時間喇，順便放晒d雜物入櫃...間屋整齊靚仔晒 ^^ 不過美中不足既係之前將幅油畫挨埋牆度，唔知係咪日日曬住搞到d牆紙有個紙皮箱的烘o係度...見到都有d心痛！

 




間房空間不足影唔到佢全貌添！不過總括黎講我地都滿意的。











夜晚我又要執行李搬返娘家住，迎接我既化療第二針啦！

7/10/2013
今日好無聊...拎左部榨汁機出黎用，試下整紅菜頭蘋果汁，同媽咪兩個玩左好耐haha~榨完出黎兩份飲，都幾易入口幾好味的，不過榨就快...功夫就多，部機太多件頭要洗好多野，我諗好快就打佢入冷宮了。 

紅菜頭含豐富的礦物質和多種不同的胡蘿蔔素，纖維又高。它獨有的甜菜鹼有助保持肝臟機能健康、具抗癌功效。用紅菜頭榨汁飲，有助淨血保肝。
 
紅菜頭蘋果汁：有抗氧化、延緩衰老、補血養顏及通血管功效。對中、老年人、患有血壓高、膽固醇高人士最為適合。

用料：紅菜頭1/4個，蘋果2個

做法：
紅菜頭去皮，用涼開水洗淨，切塊。
蘋果去皮去核，切塊。
同放入榨汁機內榨成汁，要盡快飲完哦，這才可保持大部份維生素及營養！

化療第一針...第十五日至十八日

1/10/2013
今日係國慶紅日，又係我休假做無飯煮婦日kakaa~等老公訓醒就一齊出去食lunch啦，不過我個頭搞左好耐都搞唔掂...太厚了，最終都係戴帽算數。食完lunch後我地就去左青衣瞭望台散散步啦！最衰黎得唔啱時候，冇得睇日落。

2-3/10/2013
呢兩日上網睇左好多人地教整頭髮既video，我都急不及待買啲髮捲返黎練習下，好可惜失敗收場，唔知係我手勢唔好定係買錯工具呢...捲完成個師奶咁hahaha~

 

 

 

就係呢隻捲俾我搞到成個師奶咁，捲完都嚇親自己...即刻噴濕個頭梳番直佢當冇事發生過算了。

 

 

 

4/10/2013
老公今晚約左friend出街，我自己一個又懶得煮飯...索性朝早食完早餐就返娘家度黐餐啦wakaka~返到娘家同家姐食完lunch後我就落街行下啦，呢排愛上行家品店，去左living plaza by aeon度行...越黎越似一個c9了，成日諗屋企d位點可以規劃得好d呢，不過執極都好似好亂咁hehe~ 

夜晚o係娘家度過左一晚夜，而家洗頭抹頭都超級煩...d頭髮碎黐住晒o係d毛巾度真係仲煩過甩長頭髮，唔知幾時先可以甩到變光頭呢！

o係living plaza既斬獲，不過左邊果舊野未識用wakaka~又俾老公話我買埋d唔等駛野返黎lu~

化療第一針...第十二至十四日

28/9/2013
今日帶隻狗仔出去洗白白，順便去信和拎埋我個假髮了。umm...個鬈比我想要的唔同...顏色比較深色左，不過戴上頭個感覺係ok的，學阿Ann話齋...個頭又唔係跟住我訓覺...臨訓前幫佢set定啦haha~今次見d帽有新款返...又買左一頂lu！原本...今日諗住剃埋個頭的，不過阿Ann話我d髮質摸上手都仲係好健康...而家剃晒佢好似有d可惜，見議我開始甩先過黎剃啦！都好...我由今朝開始個心都掙扎左好耐...都有d唔捨得，成日o係度諗我會唔會係少數唔會甩髮果群呢?!haha~(發緊夢~) 

搞掂之後諗住搵野食啦，點知行過adidas俾佢吸左入去...咁就買左件外套喇wakaka~開心晒可以去食lunch lu！搵左間寿司坐低...自從我有病開始我地都冇食過寿司了，一打開menu果然我有好多野係唔食得的，不過唔緊要...今餐志在陪老公姐。食飽飽後陪老公去番信和訂漫畫書，仲俾佢發現左隻幾抵玩既ironman，咁就帶埋佢返屋企啦！之後再去買埋家品野同洗車用具...時間啱啱好，狗仔沖完涼lu～可以順路接埋佢返屋企啦！返到屋企執完一輪屋後又要出街食晚飯喇，無意中又俾我發現roxy減價kakakaaa~又買左件衫...不過冇貨...要搵日出旺角舖拎啦！

夜晚返屋企我拎左個假髮出黎放左o係細房，隻傻狗d反應好好笑...成日走入去徘徊望住個假髮，唔知會唔會以為係人頭黎haha~不過我有時行過望到都俾個頭嚇親haha~

我個假髮既真面目~

老公既新玩具，曉聲控著燈的~

29/9/2013
今日同老公去左東涌食晏&行街街，今次到老公有收穫啦...買左件外套 ^^ 行完我地去下一站...旺角，去roxy拎番我件衫，順便去花墟睇下有冇野啱，呢期既我興種植物...好想擺到成個窗台都係綠色hehee～左揀右揀最終帶左盆細葉森樁&虎尾蘭返屋企。

MySweetHome又多盆靚靚植物啦...唔知呢盆細葉森樁襟唔襟養既呢hehe~

夜晚沖涼洗頭時...恐怖既甩頭髮場面終於出現喇，好彩我有晒心理準備，心情未受影響，只係覺得執頭髮呢個動作好困擾，d頭髮又打晒結又霉...搞到我都唔敢梳頭了，吹乾個頭拿拿聲訓覺，聽日要去同你做個了斷 .\_/.

30/9/2013

估唔到isis今日咁full...要下晝先有位幫我剪頭髮，搭車出去既時候幾驚俾人見到我勁甩頭髮呀，但其實都只係自己心理作用吧！阿Ann落刀前俾晒心 理準備我好似好驚我會喊咁，哈哈！不過原來唔係幫我剃光佢的，只係剷青姐...話怕剃光會整到我有傷口，個look都幾搞笑下。戴番個假髮走人，不過好似好厚咁，一路行好冇安全感...好似想甩出黎咁...仲好似有少少穿崩添！ 

今晚返左娘家食飯，佢地見到我個假髮話完全睇唔出係假，係真唔係呀？！不過我都係要帶番頂帽俾啲安全感自己先敢出街啦！離開娘家約左保險agent拎番d單既certificate true copies，要盡快claim埋公司果邊啦！

化療第一針...第九至十一日

25/9/2013
今日既訂電話行動又失敗，有左尋日既經驗...我今日都已經連sms都ready定...一load到個畫面就即刻send出去架啦，點知都係得番灰黑 64GB...呃錢的。玩完一輪後...我今日冇番訓啦，叫左爸媽起身落公園晨運haha~行左都差不多成個鐘啦，之後我就去麥記買早餐...估唔到媽咪一粒反對聲都冇wakaka~

尋晚同老公講起等我治療完後我地要去個旅行慶祝...究竟去荷蘭好定希臘好呢?!佢叫我反正日日咁無聊...做個proposal俾佢揀喎！我今日就用左下午既時間上網search下資料啦，越睇真係越想快d飛去希臘，睇見人地blog d相真係超正。不過上網搵料都冇從入手，即刻走落書局諗住買本書睇左先，好可惜我想買果本全線冇貨...真係誇張，失望而回。

26/9/2013
繼續堅持晨運，不過今日行完返屋企都係敵唔過睡魔既呼喚。

晏晝原本想返組坐下，點知又懶懶閒攤左o係sofa度唔願郁...我真係越黎越似隻大食懶啦！

27/9/2013
三分鐘熱度既我...今日冇去晨運啦haha~改左去飲茶，真係做人以黎第一次咁早去飲茶呀！之後成個下晝都冇野做...等老公收工過黎同我落街買下雜貨，去左IKEA買食物盒&磨刀器。我今晚就搬返去MySweetHome暫住數天啦，一如以往...媽咪準備左好多野要我拎返去，又食又拎咁！

返到去MySweetHome...OMG...我又有排大掃除了!!!!!!

化療第一針...第七至八日

23/9/2013
今日既我復活了hahahaha~全日既精神都幾唔錯，黃昏時段突然好想食公仔麵...求左媽咪好耐先肯俾我食半包haha~而家既我原來可以食公仔麵已經好心滿意足了。

24/9/2013
晨咁早6點就起身訂電話了，點知行動失敗...繼續大覺訓到九點幾先起身。今日有d感冒既症狀咁...打噴嚏流鼻水，不過持續左唔係好耐又冇事lu！

下午返診所抽血，呢度d姑娘手勢真係好...一d都唔痛。抽完後同媽咪落左去買番張六合彩...今晚有金多寶...買個希望都好丫。之後我地就去食下午茶，食完都夠鐘上去聽報告lu！蔡醫生話我個報告幾好...全部合格hehe~我就打蛇隨棍上問下次可唔可以打少d升白針啦，可惜...答案係no，不過可以升班都好開心了，代表我向成功邁向一步丫嘛！

化療第一針...第四至六日

20/9/2013
今日係中秋節翌日假期，由於蔡醫生今日休息的，咁我要打既升白針點算呢?!聽病友講佢之前假期會去鄧肇堅醫院度打的，咁我尋日都穩陣起見打電話去問左先架喇！今日媽咪十點幾陪我過去，原來政府好鬼抵...打一支針$17姐，俾完錢就坐低等叫名啦！好快地有個姑娘叫我入房，不過係同我講佢幫我唔到囉!!!! 話由於我o係私家診所做化療，政府冇我record所以唔可以幫我打，唉~我求左佢好耐都冇用...粹之要退錢再諗辦法，仲以為一切可以好順利添！諗住近近地走去養和，但打電話過去問又話要o係佢地度買針藥先得喎，最終去左天一診所，不過超級掠水...$380一支!!最衰我唔敢自己落針，唯有俾錢人賺啦！

打完針去左翠華買外賣，等左半粒鐘吹左好耐先有，真係等到個人燥燥地呀！不過最辛苦都係媽咪...要佢成日為我奔波我真係好過意唔去呢！希望快d完成療程...大家都可以開開心心啦！

21/9/2013
今日依然骨痛，去蔡醫生度打完升白針後就返屋企恰左陣啦！不過下晝頂唔順都係要食兩粒panadol，本身老公話過黎同我遊車河，最終見個太陽咁猛都係匿o係屋企算了。

是日胃口好好，成日都好肚餓咁，我既體重都重左幾磅添呀，唔知係咪水腫黎架呢hehe~我有時懷疑緊我d副作用唔係太勁...究竟化療d針對我係咪冇幫助呢?!

22/9/2013
朝早起身已經三號風球了，尋晚成晚瞓得唔好，仲要起身啪左兩粒panadol添！

今日博下打去公司醫生度睇下有冇開...thanks god，10:30am可以去打埋last呢支升白針了。鄭醫生好細心，問下我病歷，又清楚咁睇支針既資料，唔似得天一既醫生求其幫你打左就算了。咁好醫德既醫生，仲竟然收我$60姐，如果我晨早醒起公司醫生咪好囉，唉~

化療第三日...第一支升白針

19/9/2013
今日上晝媽咪陪我去蔡醫生診所度等打升白針，好快地姑娘就教我打成支針既過程喇，唔知係咪望住佢吉入自己肚皮度...心理上會痛d架呢?!haha~呢支針要連續打4日，姑娘叫我返到屋企試下自己落唔落到手呢，事關聽日係中秋節紅日...冇人幫到我...慘！

返到屋企食完lunch就眠左一陣，等老公今晚過黎做節。唔知係咪升白針起左d副作用...輕輕摸下頸後d骨都有d痛呢!!姑娘有叫如果痛就食 panadol，不過我唔想食咁多藥...都係忍下當冇事。飯後一家人食雪糕月餅...我破戒偷食左一啖仔，真係好耐冇食過雪糕了，少少過下口癮都好過冇啦！不過食完就知味lu...深夜有少少喉嚨唔舒服添，要間唔中起身飲水舒緩下。

今日收到公司HR同事送俾我的果籃，真係好感恩佢地對我既支持，我一定要快快復原返回公司個大家庭的。

開針了...TC第一針

17/9/2013
今朝一起身...心跳比平時跳得快左...心情開始有d緊張...有d恐懼，唔知係咪今日要開針的關係呢?!食完早餐後約左個病友俾左兩包花生衣俾我，真係好好人...我地素未謀面都咁幫我，聽講花生衣煲水黎飲係有助升白血球的，我以後每日都要乖乖地吸收多d營養了。

2:30pm 媽咪陪我一齊去蔡醫生度，好快地量左血壓、磅重之後就入房等醫生黎落針啦！首先係種豆豆o係手背，醫生話好彩我係打四針姐...而我d血管都幾明顯... 可以每次用唔同血管打。之後落左止嘔藥、鹽水、之後就開始落化療藥啦，幸好都冇唔舒服，只係個心有少少翳住姐，訓到5:45pm左右就走得lu！不過往後呢幾日都要食好多藥呢...唉~

 

蔡醫生叫我返去買呢隻冷熱敷墊，得閒就用冷敷黎敷下吊針果隻手，作用係保護番d血管丫！

 

  

  

晚餐既食量都算正常，只係每啖飯都要比平時咬多幾下，等個胃盡量易啲消化，臨訓前仲竟然感到肚餓...沖左杯燕麥片食飽就訓lu!但唔知係咪藥物既影響，成晚冒汗訓得唔好呢！五點醒左就失眠lu!

為化療作準備

14/9/2013
拖延左好耐都未打既第三針乙型肝炎預防針終於o係今日搞掂了。之後就再去信和選購我既新髮型，最終都係揀左個長髮...同我自己冇乜大分別haha~，染連電都要一星期後先有貨呢，月尾就係我剃道之時喇，唔知我既光頭仔look會係點架呢！@@" 順道買定d ORAL IMPACT，要每日飲一包都幾貴下...仲幾難飲下添！呢個病好似有好多野要作好準備咁，我既情緒又開始黎料喇...究竟幾時先識得正面面對呢?!

購傢俬日

8/9/2013
今日去左DSC睇組合床，一心諗住買佢快快趣搞掂等下星期送貨黎，順便襯我仲有精神執下間房啦，點知去到睇到有張安全標籤寫住上床負重50KG，再問問家姐check下工人幾重，家姐就話之前有過新聞話DCS d高架床試過塌落黎...有d驚驚。為左安全起見...我同老公最終都係過去鍵榮訂造算了，雖然價錢貴一倍，但望落用料穩陣好多，而且款式又係我地一致睇中的，今日黎睇第二次都依然鍾意，就成交啦！盛惠六千大洋。

呢個款好colorful...望到佢人都愉快d ^^

幾日後sales姐姐好快出到圖俾我喇，我地將佢改款...唔要書枱&底下櫃桶，改晒衣櫃，可以多d位擺野嘛！好期待實物的來臨丫。

一切已落實了

7/9/2013
今日晨咁早就同老公出發去中環，約左私家腫瘤科蔡醫生，等左個幾鐘先到我，蔡醫生係一樣的見解...TC x 4，仲講左好多化療時既副作用我知，而對於我日後仲有考慮生小朋友呢點...蔡醫生就建議我打收經針黎保護卵巢，佢話有病人都係咁打...生育既機會成數都好高。聽完蔡醫生的話...我又有d心郁想o係私家打，始終都係同一個醫生follow up...唔同政府醫院。經過同老公and家姐既商討後，都係決定搵蔡醫生...順便今日打埋收經針。

姑娘俾左d麻醉藥膏俾我搽，叫我地食完 lunch返上黎打針，初時醫生檢查過我d藥膏搽得咁少...講左句話都要試下...真係嚇死我，好彩只係一下吉的感覺又唔係流好多血姐，之後就去附近大廈做埋抽血，準備月中開針啦！抽血...其實我都唔係第一次架啦，但硬係唔知心理有咩問題...突然情緒好低落...喊左出黎，唉~

搞掂晒就去旺角信和睇假髮，果度d服務態度都好好，俾我試左好多唔同造型，原先我想玩個短髮look的...但原來好唔襯我...成個師奶咁haha~玩完一輪後都係返屋企諗清楚自己想要咩長度先再買，始終係假髮...冇得變haha~

我又添公司麻煩了

6/9/2013
今日收到公司HR既來電，問我大約幾時可復工，如果我仲要治療的話...佢地就請個temp黎頂住先，原來我放左假既呢個月都有點兒亂，我突然咁走真係俾左好多麻煩人呢，希望佢地可以快d請到個temp黎幫輕下，我個心都唔會咁難過呢！  

好好彩我遇到呢間公司，可以俾我停薪留職，仲有關心我的同事，真係好感動！

政府醫院覆診記

4/9/2013
今日約左去瑪麗醫院見腫瘤科醫生，由兩點半等到四點先到我。主診既曾醫生係一位年輕女性黎，個樣都幾似楊千嬅haha~佢睇完晒我d報告同傷口後，就同我解釋得好詳盡術後治療既野，曾醫生都係建議我打4支TC，全個療程大約六萬留下。之後再做電療及食荷爾蒙藥，穩陣d既就食十年荷爾蒙藥.......，但礙於我同老公都仲存有一點希望第時可以生小朋友，十年對我黎講實在太長了。聽到五點幾講解完畢，曾醫生幫我地約左婦產科下星期聽埋留胚胎的技術。

今日亦係我搬番MySweetHome既大喜日子hahaha~心情真係輕鬆晒，順便可以避一避風頭...無謂留o係娘家大家面阻阻啦！

手術後第二次覆診

2/9/2013
終於等到今日去覆診了，今次主要檢查傷口+聽oncotype報告，本身約左11:30am的，但呆坐地一路等到點幾先到我。張醫生為我檢查傷口...話埋得幾靚，但我傷口旁有粒好細既硬硬的東西，醫生為我照超聲波...話係皮膚表面的瘤仔，叫我唔駛擔心喎！之後聽報告...我心情好緊張呢，醫生話我既復發率唔高...屬低風險的，但礙於香港既醫生對oncotype仲未好熟悉，而且怕我有少許淋巴受左感染，所以都係見議我做化療穩陣d，但就可以由之前講既 AC x 4 + TC x 4減刑至TC x 4就可以了。而我問醫生...打左化療可以減低幾多個%復發，答案係3%!!真係好掙扎...究竟我接唔接受化療好呢?!化療對我係咪真係有用呢?!

過份關心只換來困擾

1/9/2013
自從我有左呢個病開始，我就覺得我生活就冇晒自由。出街的時間地點人物不單要向母親大人報告，連想同老公去戶外拍拖...父母都話要跟埋一齊，今日終於為左我明天覆診而嘈交了。我知道父母係出自關心，但有d關心只會造成我既困擾，增加我心理壓力，點解唔可以尊重下我既意願呢?!我唔想我往後既人生都係咁過...

行到腳仔軟...

31/8/2013
今日晨早就要起身了，約左家姐去城皇廟還神...因為手術前家姐黎幫我求神保祐，而家一切順利都要感謝神恩了。姨甥女都有一齊黎，我地食完lunch去左花墟買野，仲俾阿姨甥女串我有選擇恐懼症添!!不過呢個星期多得佢，我既心情都開心左好多。我買左盆虎尾蘭諗住放o係屋企辟下d有害物質，順便美化下屋企， 哈哈!!

之後我就同老公去左荃灣睇傢俬，準備定張床迎接工人姐姐既來臨了。睇左好多間，價錢都好浮動，由三千幾至六千幾不等，最後當然又係我既選擇困難症既影響...冇斬獲，返屋企慢慢再考慮下先。之後我地就去青衣城買空氣清新機，之前MySweetHome裝修完d味都好似陰雲不散咁，希望有左部機可以減低屋企d病菌啦！

 o係凶澤果度經sales哥哥介紹話呢部抵用，折實都係一千八百幾，我地仲有五百幾cash dollar用...埋單都係千三鬆d，wahaha~

中醫的見解

29/8/2013
今日去左上環睇蔡醫師，順便帶埋份病理報告俾佢睇下，話佢知我等緊oncotype test既報告，唔知點解佢聽到我做呢個test就笑得好奇怪，又話睇我情況就唔駛化療都得，只不過食荷爾蒙藥就有需要的，但因為有副作用...會影響子宮，醫師話佢d病人都會選擇唔化療唔食藥，以中藥調理，但叫我等報告後聽埋西醫再自行決定呢！臨走前醫師千叮萬囑叫我乖乖地戒口，慢慢調理好身體，唔好食街外食物、唔好食白砂糖、戒奶雞蛋...oh~往後既人生好似冇乜自由了。

退休生活

22/8/2013
今日又去左每星期一次既小組，今次好多人丫，各位師姐都討論緊化療既事，仲有位師姐都有做過oncotype dx，但最終都係要化療...sigh...睇黎我都係唔好抱咁大期望...只怕會失望。小組後社工教左我d伸展運動，對於割左淋巴有幫助的，以後每日既生活都加添左份工作了。

上完堂我自己沿住維園慢慢行返屋企，感覺自己好似d公公婆婆咁過住退休生活，哈哈~唔知第時返工會唔會唔慣呢!!

手術後第一次覆診

19/8/2013
終於等到覆診既日子喇，唔知之後要做d咩術後治療呢、唔知我個傷口埋成點呢...

本身約左4點見醫生，好彩打一打去診所問姑娘...叫我5點幾先好去，點知去到...哇~診所坐滿人，仲要而家先睇緊3點症...oh~有排等，粹之等到7 點幾先到我。張醫生話我個傷口埋得幾理想，可以開始做下運動啦！之後就叫埋老公同家姐一齊聽報告，醫生話我可以做一個叫腫瘤基因測試(oncotype dx)既野，send我d組織去美國測21種基因，睇下復發率高唔高，若果指數低的話就可以唔駛做化療，但要花費三萬幾蚊...又係錢錢錢!!!但如果唔做呢個test，醫生就見議我打8支化療針(AC x 4+TC x 4)+電療+食5年荷爾蒙藥。最終家姐話有機會唔駛化療的話緊係做埋個test先啦，因為化療針又未必對我d細胞起到作用，當買個希望，不過又要等兩個星期先有報告了。

情緒低落

16/8/2013
今日o係屋企無無聊...突然諗起港台有個節目"癌症解碼 - 乳癌篇"，咁就屎忽痕按黎睇啦！雖然同路人講過呢個故事係特別d的case，睇完唔須要咁驚，但係我都忍唔住自己不停咁幻想，好怕自己第時既治療都會咁 worse...突然間情緒失控喊左好耐，加上飲左中藥不停肚瀉，心情難免更加沈重。其實我知道身邊o既人都好關心我，叫我歡容d、正面d...但佢地永遠唔會明白我內心果種痛苦...我真係唔想接受治療可以嗎?!

同路人

15/8/2013
今日家姐陪我參加香港乳癌基金會既小組，去果度聽下同路人既分享，吸收定多d資訊。同路人俾我既第一印象係...大家都唔似病人，個個都好開心好樂觀又會互相鼓勵，o係度聽到好多正面既資訊，病發後儘管對家人對朋友講無數次...佢地都唔會明白我既感受，但呢度唔同...因為我地行既路係一樣的。我都要學習一下同路人分享的凡事唔好咁執著、做事放慢腳步、慢慢改變自己既生活態度。上完小組，我順便測試埋自己淋巴指數，託賴指數好正常。

我在養和的日子

7/8/2013
話咁快就要入院準備做手術了，心情有d驚有d緊張，人生第一次入手術室唔知係點架呢?!

今日爸媽陪我去養和辦入院手續，好彩呢度環境幾好，d護士又好nice，咁都冇咁驚。晏晝就開始要做檢查，驗尿、抽血、照心電圖、照肺、做同位素掃描，搞左 2,3個鐘就可以上房休息了，之後有個物理治療師黎幫我度腳，話要整對壓力襪俾我做手術時著住，怕我全身麻醉唔知要瞓幾耐d血液唔循環丫！晚餐同老公落左canteen食，食左個豬扒焗飯...淡淡的...sigh...，今晚12點要開始禁食，明天要做手術啦！

8/8/2013
晨早七點就俾姑娘叫醒要換衫了，仲諗住12點先做手術唔駛咁早起添！九點幾又要去做檢查，照超聲波同mammography。不過呢個 mammography又令我驚到喊，聽完護士講解過程後，我已經諗起又忍唔住喊，擾攘左一陣先可順利進行。呢個除左要夾胸外，醫生仲要打麻醉針、吉兩支針入去定位、仲要穿d鐵線入去....OMG...穿鐵線果下就好似補衫咁，我feel到d鐵線o係我d皮膚度拉扯......諗起都想嘔！搞掂上房休息 了，離遠見到老公又忍唔住喊了，好無用。爸媽黎坐左冇幾耐，12點左右護士就車我落手術室了。

瞓o係手術室門外...等左好耐，大約點幾鐘吧就有 護士黎同我對資料、簽同意書，再有麻醉師韋醫生黎同我打招呼，果一刻我個人突然好平靜...冇晒驚恐既感覺。等張醫生黎同我確認完後，護士就推我入手術 室，裡面已經有好多醫護人員準備緊手術緊野，o係我身上整左好多野、護士為我打豆豆落鹽水、韋醫生俾氣我吸...吸左幾下就開始瞓著了。

當我有意識時已經上番房了，但整個人好累淨係想瞓覺，只記得我的家人、老公、大姑拉o係度陪過我，我有食過粥、飲過水，護士好頻密咁入黎睇我、清引流既血水.....。佢地話我既手術好成功，大約兩個幾鐘就完成了，幸好冇擴散到淋巴，只割了6粒前哨淋巴+1粒腫瘤，計時炸彈冇了我都可以暫時鬆一口氣了。

9/8/2013
今日醫生9點左右巡房，同我檢查完就可以拆左個鹽水了，我可以落床自由活動啦！夜晚朋友A,C & Y黎探我，大家都研究緊點自我檢查，我都想我身邊既朋友可以有呢方面既意識，保持身體健康。

10/8/2013
今日六叔六嬸仲有我一位同事W都有黎探我，同事W真係好好人...由發現病至今一路鼓勵我，今日仲送左盆麵粉花俾我祝福我身體健康，我知道大家都好關心我，我要努力d對抗呢個病魔。接近黃昏時段護士通知我去洗傷口，張醫生幫我拆引流、洗傷口，話傷口埋得幾好呢，不過我全程唔敢望，搞掂後醫生宣佈我可以出院lu！但係有個唔好既消息...就係化驗得出我屬2A期cancer，等一星期後再返診所聽詳細報告。

 由今日開始我要搬返娘家暫住一段時間lu，希望快d康復可以搬返去MySweetHome啦！

不幸中的大幸

大幸一.
由發現呢個病開始到決定做手術了，我都仲未回到魂諗下我應該有咩要準備，一路都係家人...特別係我家姐對我既支撐，無論係金錢上定精神上，佢地都對我無微不至，呢份愛真係令我好感動。

大幸二.
從前既我會覺得買保險既作用唔大，因為從來冇諗過自己會有病，呢個想法真係好天真。但好彩地早幾年認識到一位做保險既朋友幫我安排之下，本著少少地都買份看門口既心態，而家真係派上用場了，不至於為金錢上而煩惱，亦唔駛加重屋企人既負擔。

大幸三.
雖然我結婚唔夠三個月發生一件咁既事係好不幸，但從另一角度看，我揀o岩結婚對象了。患病期間老公都陪我出入醫院診所，包容我既情緒，甚至負擔我既醫藥費都毫無怨言，其實我有著另一種幸福！

我要感恩o係我身邊有好多人關心我，我唔係自己一個打呢場仗的，我要變得堅強點。

廣華見醫生

5/8/2013
經過呢2,3日既考慮、同家人既分析，大家一致決定我既手術都係搵張醫生操刀，不過既然之前約左廣華...今日就一於去聽埋醫生又有咩見解先啦！請左下晝假...老公同家姐都陪我一齊去，登記後都係做左基本驗尿、量高磅重、問卷調查...，到見醫生時...姑娘同醫生講左幾次話我粒野咁細粒咁隱蔽都俾我發現到真係好好彩，可能真係上天見我命不該絕啦！哈哈！

醫生check完後又再等另一位醫生黎check，之後佢地兩位醫生溝通完話我呢個case做全乳或 局部切除都得，不過局部切除就唔包保可以切得清，有機會做完手術後會再check到仲有癌細胞o係體內就要再做多次手術，所以都係見議我做全乳切除。當時我覺得醫生講得好冇信心，切得清唔清唔係手術時可以判斷到架咩?!點解講野可以咁模稜兩可既?!醫生都冇信心、病人點樣對你有信心呢?!都係疊埋心水等張醫生覆個期俾我了！

要接受現實...向另一位醫生咨詢意見

2/8/2013
今日老公同家姐一齊陪我去張醫生度睇下有咩意見，約左兩點幾...但等左好耐...先有姑娘同我初步傾談。之後就係張醫生同我照超聲波，再同埋我家人一齊 傾。張醫生既見議就係可以做局部切除+前哨淋巴睇下有冇感染先，佢估計我係第一期...所以痊癒率都好高。好彩家姐幫我問左好多問題，唔係我就仲係懞懞下了，但由於廣華今日打黎話可以排到5/8俾我見醫生，所以又要等聽埋廣華先喇!!不過張醫生都叫我照左mammography睇下先，refer左我落樓下化驗所做，又係等...。曬完d片後上番張醫生診所，再等見一見張醫生...佢話照到我有d鈣化點，做手術時要一齊清埋出黎，而搵佢做手術就一定要住養和，埋單預廿萬以內啦！嘩~超級貴！不過今日既診金都好貴...盛惠三千大洋!!仲要睇到七點幾先走得...果然係大醫生！ 

之後老公同家姐就陪我去附近睇中醫，嘗試下中藥又對我有冇幫助啦！醫師睇完我d報告後，話手術就必要架喇，但之後都可以食中藥調理好身體準備化療。先執左五劑藥先，手術前就要停藥了。

今日我開始接受現實了，個心開始安定左少少，開始冇咁迷惘，可能係已經有個大方向知道下一步要點做吧！真係好感恩我有家姐及老公陪伴o係我身邊。

你真係唔好彩...確診左係breast cancer...

1/8/2013
今日公司開始埋數，忙碌既工作又來了...  

十一點幾...電話響起...

陳醫生: 報告返左了，你幾時過黎聽報告?!
我: 可以o係電話簡單講講嗎？
陳醫生: 驗到d組織係唔好既野...係壞細胞...即係cancer...你而家可唔可以立即過黎聽報告?!

我當時既煩惱係公司埋緊數...唔知俾唔俾我咁急請假呢?!我老公唔知又得唔得呢?!所以同左陳醫生講話聽朝過去。收線後我個腦一片空白唔知應該點做，好彩 同事w提醒我唔好等，唔好自己亂想...快d去聽報告睇下下一步點做吧!聽罷我就入左阿姐房，關埋房門同佢講我既狀況，眼淚又忍唔住了...。阿姐好體諒 俾我即刻走，但我呢期密密請假，我真係覺得好對唔住我d同事，又怕人地唔知點睇我呢?!幸好老公都可以即時請假陪我去聽報告，我一個人實在應付唔到呢d打擊...

去到診所，陳醫生就解釋我份報告，佢話:「你家族冇呢d病例?!咁你真係唔好彩，你確診左係breast cancer。我建議你做全乳連腋下淋巴切除，咁樣會比較安全d...復發率低d。不過如果你搵我做手術...我要八月尾先可以幫到你。」聽後我就叫醫生寫轉介信俾我去廣華睇，見網上對廣華o係呢方面都大獲好評，咁聽多個意見都冇壞丫!

呢件事...家姐都幫我搵左好多資料，今日知道我確診了，就叫我fax份報告俾一位姓張既醫生診所睇睇，話係呢方面既權威，亦係香港乳癌基金會既創辦人。fax後姑娘好快手call番我約我聽日見醫生了。

下午，老公陪我去廣華排症，見我係urgent case幫我排左快症，但都要等12/8先可見醫生呢！

人生第一次如此惶恐

27/7/2013
「報告出左了，照到粒野個外圍形態唔係好靚，應該唔係水囊黎，我建議你再去做抽針化驗」陳醫生同我講完呢番說話，我既情緒崩潰了。呢日只有不停咁喊，腦海出現 好多問題...點解會係我?!我又冇做過壞事冇做過傷天害理的事點解會有d咁既病?!我剛結婚兩個多月就要打亂我生活...係咪註定我唔可以有幸 福?!....雖然老公不停叫我唔好諗到咁灰，一日未化驗未確診就唔好向差果邊想，但我好似已經打定輸數了...眼淚控制唔到咁不停流......

29/7/2013
今日又要請半日假去中環卓智做抽針了，媽咪唔放心話要陪我一齊去，本身我諗住好似抽血咁簡單架姐，但估唔到呢次經歷會係我人生中最驚最失控既一次...

話說姑娘向我解釋今次做幼針抽組織，醫生會一路用超聲波睇住個位黎落針，感覺就好似抽血咁吉一下架姐。但當彭醫生入到黎，照一照就即刻走左...仲等左好耐 佢都未返，咁姑娘就叫我著番衫過另一間房休息下先。我個心即時好驚又有好多疑問，究竟發生咩事?!一問姑娘之下，話彭醫生覺得呢個case唔應該做幼針， 應該要做粗針+mammography，而家同外科既陳醫生傾緊睇下駛唔駛轉。同時間...姑娘又向我解釋粗針又有咩分別，粗針就好似鉛子筆頭咁粗，但會 打麻醉針所以唔會覺得痛，之後會打五下針抽組織，會聽到啪啪聲，完成後可能會流好多血，傷口附近會瘀，所以要o係診所度休息半個鐘以上，另外 mammography會有少許幅射，作用係睇下有冇鈣化點，但如果有懷孕就唔做得了。突然間既轉變我消化唔黎，啲問號又再走出黎了。叫左媽咪入黎商量， 而我又唔知自己有冇懷孕，結果就只做粗針先。懷住戰戰兢兢既心情再入房準備了，彭醫生好凝重咁同我講我應該要做埋mammography，唔應該再考慮生 小朋友了。佢咁講係咪都幾肯定我係cancer呢?!

開始落麻醉針了，少少痺。之後就係一連五下既針，雖然真係唔痛，但係身體感受到有種壓力o係 度，每啪一下，我身體既顫抖就越來越勁。終於都完成抽針，又要過房敷冰袋休息半個鐘。我踏出門口果一下，眼淚已經不停咁流，我知道媽咪見到我佢都好難過 的，我嘗試深呼吸要自己冷靜，奈何我戰勝唔到內心既恐懼!!報告又要等4,5個工作天了...等待真係好痛苦。

惡夢的開始...

14/7/2013

一直以為自己身體唔錯， 從來冇想過大病會成為自己朋友的。

點知...今日無意中摸到自己左胸有粒硬物，唔會咁後生就中招吧?!之前聽講座話身體肥胖、缺乏運動、年齡40後先係高危架播!! 呢個問題纏擾左我成個星期，本身同事叫我唔駛咁緊張，叫我約廣華婦女檢查check左先，但要等到30/8先有位，我實在等唔切了，反正公司醫生又免費的，都係要搵個普通科睇睇安心d...有咩事都可以及早醫治，但公司醫生要搵個女西醫實在不易...要等到星期六先有呢！

20/7/2013

終於都等到今日有女西醫了。醫生幫我觸診後就問左我好多問題，佢d誇張既反應真係嚇親我，話寫封轉介信叫我星期一好快d續個外科醫生打去問下邊間最快有得睇，又叫我唔好揀男定女醫生了。返到屋企見時間尚早，駁一駁睇下有冇外科醫生係今日下午都開診啦，好彩地搵到銅鑼灣有，唔駛再拖啦...

去到陳醫生度，觸診初步估計係水囊，只要打支針入去抽番d水出黎就得，但為左安全起見醫生都叫我去照一照超聲波睇下先，心情有少少 放 鬆左，希望下星期去照完個報告話我知冇事啦！

22/7/2013

今日請左一日假去中環卓 智度照超聲波，先是姑娘check，之後再有個醫生黎check左好耐，唔知係咪壞消息既開始呢?!又要等2,3個工作天先有報告了...