化療第一針...第九至十一日

25/9/2013
今日既訂電話行動又失敗，有左尋日既經驗...我今日都已經連sms都ready定...一load到個畫面就即刻send出去架啦，點知都係得番灰黑 64GB...呃錢的。玩完一輪後...我今日冇番訓啦，叫左爸媽起身落公園晨運haha~行左都差不多成個鐘啦，之後我就去麥記買早餐...估唔到媽咪一粒反對聲都冇wakaka~

尋晚同老公講起等我治療完後我地要去個旅行慶祝...究竟去荷蘭好定希臘好呢?!佢叫我反正日日咁無聊...做個proposal俾佢揀喎！我今日就用左下午既時間上網search下資料啦，越睇真係越想快d飛去希臘，睇見人地blog d相真係超正。不過上網搵料都冇從入手，即刻走落書局諗住買本書睇左先，好可惜我想買果本全線冇貨...真係誇張，失望而回。

26/9/2013
繼續堅持晨運，不過今日行完返屋企都係敵唔過睡魔既呼喚。

晏晝原本想返組坐下，點知又懶懶閒攤左o係sofa度唔願郁...我真係越黎越似隻大食懶啦！

27/9/2013
三分鐘熱度既我...今日冇去晨運啦haha~改左去飲茶，真係做人以黎第一次咁早去飲茶呀！之後成個下晝都冇野做...等老公收工過黎同我落街買下雜貨，去左IKEA買食物盒&磨刀器。我今晚就搬返去MySweetHome暫住數天啦，一如以往...媽咪準備左好多野要我拎返去，又食又拎咁！

返到去MySweetHome...OMG...我又有排大掃除了!!!!!!

化療第一針...第七至八日

23/9/2013
今日既我復活了hahahaha~全日既精神都幾唔錯，黃昏時段突然好想食公仔麵...求左媽咪好耐先肯俾我食半包haha~而家既我原來可以食公仔麵已經好心滿意足了。

24/9/2013
晨咁早6點就起身訂電話了，點知行動失敗...繼續大覺訓到九點幾先起身。今日有d感冒既症狀咁...打噴嚏流鼻水，不過持續左唔係好耐又冇事lu！

下午返診所抽血，呢度d姑娘手勢真係好...一d都唔痛。抽完後同媽咪落左去買番張六合彩...今晚有金多寶...買個希望都好丫。之後我地就去食下午茶，食完都夠鐘上去聽報告lu！蔡醫生話我個報告幾好...全部合格hehe~我就打蛇隨棍上問下次可唔可以打少d升白針啦，可惜...答案係no，不過可以升班都好開心了，代表我向成功邁向一步丫嘛！

化療第一針...第四至六日

20/9/2013
今日係中秋節翌日假期，由於蔡醫生今日休息的，咁我要打既升白針點算呢?!聽病友講佢之前假期會去鄧肇堅醫院度打的，咁我尋日都穩陣起見打電話去問左先架喇！今日媽咪十點幾陪我過去，原來政府好鬼抵...打一支針$17姐，俾完錢就坐低等叫名啦！好快地有個姑娘叫我入房，不過係同我講佢幫我唔到囉!!!! 話由於我o係私家診所做化療，政府冇我record所以唔可以幫我打，唉~我求左佢好耐都冇用...粹之要退錢再諗辦法，仲以為一切可以好順利添！諗住近近地走去養和，但打電話過去問又話要o係佢地度買針藥先得喎，最終去左天一診所，不過超級掠水...$380一支!!最衰我唔敢自己落針，唯有俾錢人賺啦！

打完針去左翠華買外賣，等左半粒鐘吹左好耐先有，真係等到個人燥燥地呀！不過最辛苦都係媽咪...要佢成日為我奔波我真係好過意唔去呢！希望快d完成療程...大家都可以開開心心啦！

21/9/2013
今日依然骨痛，去蔡醫生度打完升白針後就返屋企恰左陣啦！不過下晝頂唔順都係要食兩粒panadol，本身老公話過黎同我遊車河，最終見個太陽咁猛都係匿o係屋企算了。

是日胃口好好，成日都好肚餓咁，我既體重都重左幾磅添呀，唔知係咪水腫黎架呢hehe~我有時懷疑緊我d副作用唔係太勁...究竟化療d針對我係咪冇幫助呢?!

22/9/2013
朝早起身已經三號風球了，尋晚成晚瞓得唔好，仲要起身啪左兩粒panadol添！

今日博下打去公司醫生度睇下有冇開...thanks god，10:30am可以去打埋last呢支升白針了。鄭醫生好細心，問下我病歷，又清楚咁睇支針既資料，唔似得天一既醫生求其幫你打左就算了。咁好醫德既醫生，仲竟然收我$60姐，如果我晨早醒起公司醫生咪好囉，唉~

化療第三日...第一支升白針

19/9/2013
今日上晝媽咪陪我去蔡醫生診所度等打升白針，好快地姑娘就教我打成支針既過程喇，唔知係咪望住佢吉入自己肚皮度...心理上會痛d架呢?!haha~呢支針要連續打4日，姑娘叫我返到屋企試下自己落唔落到手呢，事關聽日係中秋節紅日...冇人幫到我...慘！

返到屋企食完lunch就眠左一陣，等老公今晚過黎做節。唔知係咪升白針起左d副作用...輕輕摸下頸後d骨都有d痛呢!!姑娘有叫如果痛就食 panadol，不過我唔想食咁多藥...都係忍下當冇事。飯後一家人食雪糕月餅...我破戒偷食左一啖仔，真係好耐冇食過雪糕了，少少過下口癮都好過冇啦！不過食完就知味lu...深夜有少少喉嚨唔舒服添，要間唔中起身飲水舒緩下。

今日收到公司HR同事送俾我的果籃，真係好感恩佢地對我既支持，我一定要快快復原返回公司個大家庭的。

開針了...TC第一針

17/9/2013
今朝一起身...心跳比平時跳得快左...心情開始有d緊張...有d恐懼，唔知係咪今日要開針的關係呢?!食完早餐後約左個病友俾左兩包花生衣俾我，真係好好人...我地素未謀面都咁幫我，聽講花生衣煲水黎飲係有助升白血球的，我以後每日都要乖乖地吸收多d營養了。

2:30pm 媽咪陪我一齊去蔡醫生度，好快地量左血壓、磅重之後就入房等醫生黎落針啦！首先係種豆豆o係手背，醫生話好彩我係打四針姐...而我d血管都幾明顯... 可以每次用唔同血管打。之後落左止嘔藥、鹽水、之後就開始落化療藥啦，幸好都冇唔舒服，只係個心有少少翳住姐，訓到5:45pm左右就走得lu！不過往後呢幾日都要食好多藥呢...唉~

 

蔡醫生叫我返去買呢隻冷熱敷墊，得閒就用冷敷黎敷下吊針果隻手，作用係保護番d血管丫！

 

  

  

晚餐既食量都算正常，只係每啖飯都要比平時咬多幾下，等個胃盡量易啲消化，臨訓前仲竟然感到肚餓...沖左杯燕麥片食飽就訓lu!但唔知係咪藥物既影響，成晚冒汗訓得唔好呢！五點醒左就失眠lu!

為化療作準備

14/9/2013
拖延左好耐都未打既第三針乙型肝炎預防針終於o係今日搞掂了。之後就再去信和選購我既新髮型，最終都係揀左個長髮...同我自己冇乜大分別haha~，染連電都要一星期後先有貨呢，月尾就係我剃道之時喇，唔知我既光頭仔look會係點架呢！@@" 順道買定d ORAL IMPACT，要每日飲一包都幾貴下...仲幾難飲下添！呢個病好似有好多野要作好準備咁，我既情緒又開始黎料喇...究竟幾時先識得正面面對呢?!

購傢俬日

8/9/2013
今日去左DSC睇組合床，一心諗住買佢快快趣搞掂等下星期送貨黎，順便襯我仲有精神執下間房啦，點知去到睇到有張安全標籤寫住上床負重50KG，再問問家姐check下工人幾重，家姐就話之前有過新聞話DCS d高架床試過塌落黎...有d驚驚。為左安全起見...我同老公最終都係過去鍵榮訂造算了，雖然價錢貴一倍，但望落用料穩陣好多，而且款式又係我地一致睇中的，今日黎睇第二次都依然鍾意，就成交啦！盛惠六千大洋。

呢個款好colorful...望到佢人都愉快d ^^

幾日後sales姐姐好快出到圖俾我喇，我地將佢改款...唔要書枱&底下櫃桶，改晒衣櫃，可以多d位擺野嘛！好期待實物的來臨丫。